Fundargerð nr. 373

Mætt voru: 

• Magnús Örn Guðmundsson (MÖG)
• Alexandra Briem (AB)
• Hrannar Bragi Eyjólfsson (HBE)
• Andri Steinn Hilmarsson (ASH)
• Lovísa Jónsdóttir (LJ)
• Kristín Thoroddsen (KT)

Fundinn sat einnig Jóhannes S. Rúnarsson (JSR) framkvæmdastjóri sem ritaði fundargerð og Elísa Kristmannsdóttir.

Framkvæmdastjóri og Elísa Kristmannsdóttir, fjármálastjóri, kynntu sex mánaða uppgjör Strætó. Tap af rekstrinum fyrstu 6 mánuðina er 142 m.kr., til samanburðar  við 599 m.kr. tap fyrstu sex mánuðina 2022. Fargjaldatekjur jukust um 39% milli ára og eru á áætlun. Rekstrargjöld jukust um 11% milli ára sem skýrist að mestu af aukningu rekstrarkostnaðar vagna og aðkeyptum akstri.

Handbært fé var 502 m.kr. í lok tímabils, þar af eru 311 m.kr. ætlaðaðar í vagnakaup, von er á níu rafmagnsvögnum í september.

Stjórn samþykkir árshlutauppgjörið með  undirritun sinni.

Framkvæmdastjóri og Elísa Kristmannsdóttir, fjármálastjóri, fóru yfir stöðuna við gerð fjárhagsáætlunar 2024. Farið var yfir drög að forsendum og fjárhagsáætlun. Allt stefnir í að enn vanti fé til að ná jafnvægi í rekstri og styrkja þarf eigið fé fyrirtækisins, sem er tæplega 150 m.kr. í mínus. Stjórn óskaði eftir þremur sviðsmyndum miðað við ákveðnar forsendur. Stjórn leggur mikla áherslu á að fjárhagsstaða Strætó verði leyst sem fyrst og að fjármagn til endurnýjun vagnaflotans verði tryggt.

Framkvæmdastjóri fór yfir ferli ábendinga, hvernig unnið er með þær innanhúss, skráningar og úrlausnir. Fylgni er milli fjölda ábendinga og farþegafjölda. Umbótaferlið er í stöðugri skoðun og verið að skoða hvernig hægt er að svara ábendingum fyrr og markvissara.

Framkvæmdastjóri fór yfir framkvæmd menningarnætur af hálfu Strætó, fyrirkomulag aksturs yfir daginn, farþegafjölda og tæmingu miðborgar að lokinni dagskrá. Nýtt fyrirkomulag gekk ágætlega og verður fyrirkomulagið með sambærilegum hætti næstu ár.

Framkvæmdastjóri fór yfir  stöðu rafræns greiðslukerfis, Klappsins og það sem er fram undan í þróun kerfisins. Stöðugt er verið að þróa og bæta virkni og uppitíma kerfisins. Fram undan er innleiðing snertilausra greiðslna,   en beðið er eftir nýjum skönnum sem þarf til þess.

Reglur um fargjaldaálag hafa nú verið uppfærðar og liggja fyrir drög frá Innviðaráðuneytinu. Framkvæmdastjóri kynnti reglurnar fyrir stjórn og voru þær samþykktar.

Fleira ekki rætt, fundi slitið kl. 9:30.