Hér má finna upplýsingar um aðgengismál í Strætó.
Notendur hjólastóla á höfuðborgarsvæðinu
Það er aðgengi fyrir hjólastóla í öllum gulum strætisvögnum á höfuðborgarsvæðinu.
- Vagnstjórum ber að aðstoða með að setja niður rampinn. Viðkomandi þarf hins vegar að vera sjálfbær með að komast inn og út úr vagninum og að festa sig í öryggisbeltið.
- Tryggja þarf að bak hjólastólsins snúi ávallt í akstursátt.
- Það kemst aðeins einn hjólastóll með í hvern vagn.
- Hjólastólar hafa forgang fram yfir reiðhjól í vagninum.
Undantekning:
Smárúta ekur á leið 22 og það er ekki aðgengi fyrir hjólastóla um borð í henni. Viðskiptavinum í hjólastól gefst í staðinn kostur á að nota leiðina í pöntunarþjónustu.
Það er gert með því að hringja í akstursþjónustu Pant í síma 5402727 minnst 30 mínútum fyrir brottför skv. tímatöflu og bíll verður sendur á viðkomandi stöð.
Akstursþjónusta fatlaðs fólks og aldraðra
Notendur hjólastóla á landsbyggðinni
Ekki er aðgengi fyrir hjólastóla í landsbyggðarvögnum Strætó eins og er.
Blindir
Blindir ferðast ókeypis með öllum leiðum Strætó.
Hvíti stafurinn, sérmerktur og sérþjálfaður leiðsöguhundur eða félagsskírteini Blindrafélagsins staðfesta rétt viðkomandi.
Pant Akstursþjónusta fatlaðs fólks og aldraðra
Akstursþjónusta Pant byggir á samkomulagi sveitarfélaga á höfuðborgarsvæðinu.
Hvert sveitarfélag samþykkir heimild hvers og eins farþega til að nota akstursþjónustuna og ákveður gjaldskrá fyrir þjónustuna.
Umsóknir eru afgreiddar í hverju sveitarfélagi fyrir sig. Í Reykjavík er umsókn send til þjónustumiðstöðvar í því hverfi sem umsækjandi býr. Í Garðabæ, Seltjarnarnesi og Mosfellsbæ er umsókn send til félagsþjónustu sveitarfélagsins þar sem umsækjandinn á lögheimili.
